Larriak izan dira aurreko astean Argentinan gertatutakoak. Javier Mileiren gobernuak pauso bat gehiago eman du bere gobernantza eredu autoritarioan. Asteazkenero egiten dute protesta pentsionistek Argentinako gobernuaren aurka, eta aurreko asteazkenerako deialdira futbol taldeetako zaleak batu zitzaizkien. Protestatzen ari zirenei bortizki oldartu zitzaion polizia, eta ehundik gora atxilotu eta hainbat zauritu izan zen.
Hori, berez, larria da bere horretan, poliziaren lana segurtasuna bermatzea izan beharko lukeelako, eta ez protesta eskubidea galaraztea. Baina, are larriagoa da, nire ustetan, horren ostean gobernuak emandako diskurtsoa, argia adierazten baitu gertatutakoa errepresioaren hastapena besterik ez dela.
Patrcia Bullrich Segurtasun Ministroak poliziaren jarduna irmoki babestu du, baita jazarpen ideologikoa habian jarriko duela adierazi ere. Futbol klubei galdegin die protestan parte hartu zuten bazkideak kanporatzeko. Botere judizialean eragiteko neurriak hartuko dituztela iragarri du, epaile batek atxilotu gehienak askatu ostean, atxiloketak legez kanpokoak izan zirela ebatzita. Poliziak larriki zauritutako lanean ari zen Pablo Grillo argazkilaria ezkertiarra dela esan du, horrek ke pote batek hilzorian utzi izana justifikatzeko.
Aipatu beharra dago, ere, egun berean Argentinako kongresuan, estrategia zikinak eta, kasu batzuetan, biolentzia baliatuta ere, Javier Mileiren alderdiak bozketa bat ekidin zuela, zeinetan Presidenteari eman zitzaizkion botere bereziak kendu nahi zizkioten. Biolentzia diot, diputatu batzuk zuzenean kolpe artean bota zituztelako hemiziklotik.
Argentinak erakusten du, aurretik Brasilek edota AEBk egin bezala, ultraeskuina gobernuetara heltzeak arrisku handia duela, sistema demokratiko mugatu eta akastuna, are mugatuagoa eta autoritarioagoa bilakatzera datozelako, ultraeskuinaren joko zelaia ez delako demokrazia, faxismoa baizik. Beraz, indarra argentinarrei, eta deia entzule guztiei ultraeskuinari eskura ditugun tresna guztien bidez aurre egiteko.
EUSKALERRIA IRRATIAzale hori:
FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.
Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.
Izan ere, zenbat eta komunitate handiagoa, orduan eta proiektu komunikatibo eraginkorragoa.
Bazkidetu zaitez!
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!