Gero eta gehiago. Gero eta gehiago dira UPN utzita PPra bidea egin duten kargu eta militanteak. Inkestek, ordea, oraingoz ez dute aurreikusten hauteskundeetan boto asko joango zaizkionik UPNri. Duela urtebete guk ere ez genuen espero hain beste karguk alderdia aldatzea, eta gertatu da.
Uste dut maiatzak 28ko gaua oso interesgarria izanen dela neurtzeko benetan UPNren baitan gertatu dena. Azkenean UPNk eskuinaren lidergo argia mantentzen badu agian PPk atzera egin beharko du, eta hauteskunde orokorretarako akordioa bilatu. Baina boto ihesa uste baino garrantzitsuagoa bada, uste dut PPk indar guztiak jarriko dituela UPN akabatzeko.
Eta bidean eskuinak asko gal dezake, indar progresistek egoera probesten badakite. Benetako aukerak daude, bai Iruñean eta bai Nafarroako beste herri askotan, eskuineko alderdiei lehen postua kentzeko, udal hauteskundeetan honek duen garrantziarekin. Hori lortzeko testuinguru ezin hobea dugu, beraz jar gaitezen denak lanean oraingoz aukera bat besterik ez dena errealitate bihurtzeko.
