Prentsarako idatzi eta prentsan argitaratu nuen lehen artikulua Argia aldizkarirako idatzi nuen, duela ia hogeita hamar urte. Jose Maria Satrustegiri elkarrizketa egitea proposatu zidaten, eta euskaltzainaren orduko aldarte iluna beti geratu zitzaidan gogoan: zer nolako nekea zekarren euskararen alde lan egiteak Nafarroan. Satrustegi aiurri biziko gizona zen, haserretu ere haserretu zitzaidan bere ustez galdera kritikoegiak egin nizkiolako, eta Argia “beti zorrotz, beti eztenka” zebilela kexatu zen. Elkarrizketa ez ematekotan egon zela esan zidan. Ez zitzaidan aurkezpen txartel txarra iruditu: “beti zorrotz, beti eztenka”. Larunbat honetan, aldizkariaren mendeurrena aitzakia, ‘Jatorrira bidaia’ izeneko egitaraua antolatu dute Argiazaleek, Iruñean barna ibilaldia, ginkana tematikoa eta oturuntza barne. Gustura ikusiko nuke Satrustegi tartean.
EUSKALERRIA IRRATIAzale hori:
FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.
Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.
Izan ere, zenbat eta komunitate handiagoa, orduan eta proiektu komunikatibo eraginkorragoa.
Bazkidetu zaitez!
