Kaixo euskaltzale: Euskaltzaleen Topaguneak, Euskal Herrian zehar, tokian tokiko bazkideekin batera antolatzen duen Euskarak 365 egun kanpaina abiatzeko prest da beste urte batez. Euskara egunero delako, ekitaldi bat prestatu dugu Iruñerriko euskaltzaleen Topaguneak: Karrikirik, Zaldiko Maldikok, Biltokik, Karrikaluzek, Zorrokak eta Euskalerria irratiak elkarlanean, Duguna dantza taldearen laguntzarekin.
Honen bidez, atsegin handiz gonbidatzen zaituztegu ekitaldira bertaratzeko. Ekitaldia bera laburra izanen da. Hori bai, aurretik eta ostean nahi izatera, aukera izanen duzu gurekin tragotxo eta mokadutxo bat partekatzeko Zaldiko Maldiko elkartean 12:00etatik aitzinera. 13:00etan, Kike Diez de Ultzurrun kazetari eta itzultzaileak aurtengo komunikatua irakurriko du, eta jarraian soka-dantza kantatua eginen dute, iaz bezala. Bideoan hain zuzen ere 2014ko soka-dantza ikus daiteke, animatu-animatua.
