Luis Sabalza Osasunako presidenteak prentsaurrekoa eman du gaur goizean Nafarroako Gobernuari aurkeztu dion auditoretzaren harira. Osasunaren zorraren berregituratzeko bi baldintzetako bat zen auditoretza bat egitea; bestea, bideragarritasun plan bat aurkeztea. Miguel Ezkurdia klubeko abokatuarekin eta Iñaki Larrañeta auditoretzaren egilearekin batera eman ditu presidenteak auditoretzaren xehetasun guztiak.
Auditoretzan justifikatu gabeko 15,9 miloi euroko ordainkatetak salatu dituztela esan du Sabalzak, 2004-2014 bitarteko kudeaketa garaiei dagokizkien irregulartasunak direla nabarmenduz; hots, Patxi Izco eta Miguel Archanco presidente ziren garaietan egindakoak. Salatu den zifra horretatik, 10,2 milioi euro hartzaile ezezaguneiegindako transferentzia edo ordainketei dagozkie. Gainontzeko 5,7 milioiak, elkarte pantaila ezberdinei eginikoak. Hori gutxi ez balitz, Ezkurdia klubeko abokatuak jakinarazi du soilik legalki frogatu daitezkeen ordainketen kontra egin dutela eta desfase totala 30 milloi eurotara iritsi daitekeela.
Osasunako presidenteak esan du 2004tik 2014ra bitartean, “errealitatearekin bat ez zetozen” kontuak eraman zituela klubak: “17 milioi euroko mozkinak aurkeztu zituzten, klubak benetan 44 milioi euroko galerak zituenean”. Gaizki sentitzen zela esan du Sabalzak, eta nahiz eta auditoretzan argi zuen klubaren egoera ekonomiko txarar agerian geratuko zela, ez zuen uste hain datu txarrekin aurkituko zenik. Bereziki auditoretzak azaleratu eta oraindik preskribatu ez duen 6 milioi euroko zor batek kezkatzen du Sabalza:” egoera benetan nolakoa den ezagutzen dugunean zor horren inguruan hitz egin beharko dugu Nafarroako Ogasunarekin”. Sabalzak ere “oso minduta” dagoela esan du, beste behin Osasunaren izena eta sentimendua ezbaian eta auzitegietan jartzen direlako.
