Nafarroako Ostalaritza elkartearekin hitzarmena sinatu du Mondragon Unibertsitateak, eta Donostiako Basque Culinary Centerrek lehen ordezkaritza irekiko du Iruñean aurki. Nafarroako pintxoek “bertako balorea” galduko dutela iritzi diote, baina, hainbat nafar sukaldariek. Tabernetako pintxoak donostiar erara nahi dituztela salatu dute.
Egoitza berriaren auka prentsaurrekoa egin dute Abaco jatetxeko Jesús Iñigo eta Nerea Sistiaga, Europako Pilar Idoate, Tubaleko Atxen Jimenez eta Alex Mujica sukaldariek. “Gure sukaldea 'donostiartu' nahi du unibertsitateak, finagoa egin”. Iruñea “Ñoñosti” bihurtuko ote den ere galdegin dute sukaldariek. Egitasmoak aurrera jarraituz gero, protestak iragarri dituzte.
Nafarroako Ostalaritzako Kooperatibak Burlatako Mugazuri industriagunean duen saltokian ezarriko dute goi mailako sukaldaritza eskolaren egoitza berria. Produktuak kooperatiban erosiko dituztela iragarri dute. Sukaldariek salatu dutenez, baina, ez dute idatzizko akordiorik egin: “Kooperatiba inguruan egon daitezkeen atzerriko saltoki handietara joateko arrisku handia dago; kooperatibak baino itxura eta diseinu landuagoa dute eta”.
Aukera “paregabea”
Nafarroako Gobernuaren Reyno Gourmet sormarkak, berriz, begi onez hartu du berria. “Aukera paregabea da”. Donostiarrek Nafarroako gastronomiaren “kalitatea” eta “aberastasuna” baliatzen jakingo dutela azaldu dute: “Orain arte ez zaio behar bezalako garrantzia eman Nafarroako orburu, zainzuri edota piperrari. Donostiarrek jakingo dute nola egin”.
