Azaroaren bukaeran hasiko da Qatarren munduko futbol txapelketa. Interes ekonomikoek agindutako tokia eta datetan. Langile migranteen zapalketaren gainean eraikitako azpiegituretan, hainbat erakundek salatu dutenez. Arrazismoan eta matxismoan oinarrituriko prestaketa baten ostean, alegia.
Bihar, berriz, bestelako txapelketa jarriko da martxan Iruñean, Biurdana parkean, Iruñerriko Arrazakeriaren Aurkako Mundialitoa, zeinean ehunaka pertsonek, adin, sexu eta jatorri ezberdinetakoek, parte hartuko duten, “Hemen denok jolasten dugu” lelopean.
Futbitoan zein saski baloiaren inguruan egun osoko egitaraua prestatu dute hainbat kolektibo sozial, politiko, kultural edota erlijiosoek, elkarlanerako gaitasun handia erakutsiz, kirola jolas moduan ulertuz, eta aldi berean arrazakeriaren aurkako tresna moduan erabiliz.
Aukera ederra, beraz, bestelako kirol ekimenak martxan jar daitezkeela erakusteko.