Ezberdintasun sozialak espazioan gorpuzten dira, bizi izaten dira. Auzoetan, hirietan. Espazioan ere txertatzen dira ezberdintasun horiek iraun arazteko tresnak. Hesiak.
Iruñeko auzoak dira espazio horietako batzuk. Hiri injustua dugu, zeinean aberastasuna eta baliabideak modu injustuan banaturik dauden. Eta hiri hau bizigarriago egiteko, auzo ezberdinetako haur eta nerabeei formazio eta aisialdirako tresna berriak emateko, ezberdintasun sozialak gainditzen laguntzeko, finean, aspaldi ari dira lanean, auzolanean, auzoetako elkarte eta bolondresak.
Hainbat erakundek, baina, tinko eusten diote ezberdintasunak mantentzeko tresnak finkatzeari, gogortzeari. Espazioak itxi, injustiziak betikotu, jendarteak kontrolatu. Horiexek Iruñeko Udala eta Konstituzio Epaitegiaren azken erabakien helburuak, auzoetako antolakuntza eta formazioa moztu nahian lehena, eta mugan bertan errefuxiatuak atxilotzeko eta jatorrizko herrialdera bueltatzea baimenduz bigarrena.
