Luzea, eta ezaguna dugu, biharko manifestaziora joateko argudioen zerrenda. Izan ere, inongo zentzu juridikorik gabekoa da Altsasuko gazteen aurkako prozesua, legedi antiterrorista aplikaturik.
Luzea, eta ezaguna ere, antzeko beste kasuen zerrenda. Raperoak, errepideak modu baketsuan mozten duten manifestariak... horiek ere terroristatzat hartuak izan dira. Erronkarin ere, espetxera joateko bidean jarri ditu epaileak gazte antifaxista batzuk.
Zerrenda luzea eta ezagunak, zoritxarrez. Izan ere, kasu konkretuez haratago, kezkagarria benetan joera orokorra zaigu. Alde batetik, oinarrizko eskubideak urratzen dituzten legedi, arau eta erabaki judizialak ugaltzen ikustea. Bestetik, larriago agian, neurri guzti horiek begi onez ikusten duten hiritarren multzo handia, hemen eta Europa osoan.
Zer egin politika horiek justifikatzen duten bizilagunen aurrean? Nola geldiarazi errepresioari emandako babesa? Erantzun zailak. Hausnarketa beharrezkoa. Momentuz, dena den, biharkoa bezalako mobilizazio zabal eta anitzean partea hartzea ezinbesteko urratsa dugu.
