Ikasle kolpatuak eta dinamika kezkagarriak

Erabiltzailearen aurpegia

Ados egon gaitezke, edo ez, atzoko kontzentrazioan Nafarroako Unibertsitate Publikoko ikasleek zituzten aldarrikapenekin, baina, edozein kasutan, kezkagarria eta neurriz kanpokoa izan zen, zalantzarik gabe, kontzentrazio horrek izan zuen zuen bukaera: polizia unibertsitatean sartu zen eta ikasleak modu bortitzean sakabanatu zituen, kolpeka.

Atzoko aldarrikapenak oso zehatzak ziren, eta horien inguruko eztabaida irekia dago, matrikulazio modalitateen inguruan. Hala ere, argi dago eztabaida horiek testuinguru zabalago batean ulertu behar direla, hau da, unibertsitateak azken urteotan izandako dinamikekin loturik.

Azken batean, hezkuntza gastuetan izandako murrizketak ikasleek ordaindu beharreko tasen gorakadarekin batera etorri dira, batez ere gradu ondoko masterretan. Horretarako, gainera, gero eta gehiago dira maileguak eskatuko behar dutenak, zorpetzearen dinamika itogarrietan sartuz.

Horiek dira, besteak beste, unibertsitatearen arazo larriak, eta jakin badakigu arazo horiek nekez konponduko direla ikasleak kolpeka sakabanatuz.