Datozen bost urtetako energi plana aurkeztu berri du Espainiako gobernuak, eta hortxe berriro gelditu dira agerian energia politikoaren ardatzak, baita horien atzean dauden interesak ere. Energi berriztagarriei eta tokian tokiko ekoizle txikiei oztopoak jartzen dizkion gobernu berak mugaz gaindiko korridore elektrikoen alde egin berri du, enpresa handien mesedetan.
Korridore horietako batek Nafarroa zeharkatzen du, Dikaztelutik pasatuz, Frantzia eta Espainiaren arteko konexio elektrikoak indartzeko asmoz. Hala ere, ez da geurea bi estatuak konektatzeko aurreikusi den bide bakarra, Pirinioen barna ere beste autopista elektriko batzuk aurreikusita baitaude.
Proiektu horiei erantzunez hamaika talde elkartu dira aurreko hilabetean Sabiñanigon. Pirinioetako hegoaldeko bailaretako hainbat ekimen interesgarri plazaratu ziren bertan, tokian tokiko energi subiranotasunaren aldeko apustua berrituz.
Izan ere, ingurugiroaren mesede zein errentagarritasun ekonomikoari begira, autobia elektrikoak baino, ekoizle txikien sarea da beharrezkoa duguna. Bestelako energi sarea, alegia.
