Larunbatean

Larunbatean euskararen olatuak hartu zituen Iruñeko kaleak. Euskara ez dadin izan, manifestuan sinatzaileek aipatzen zuten moduan, museoetan gordeta geratzen den pieza. 
Euskara izan dadin Nafarroa zeharkatzen duen indarra eta gure bizitzak hartzen dituen arrastoa. Milaka pertsona atera ginen kalera aldarri ozenarekin: Nafarroa euskara gabe ezin da ulertu, eta alderantziz. Egin dezagun bidea, alor eta eremu guztietatik, euskaraz bizitzea ez dadin amets soil izan. Izan dadin, konturatu gabe ere, gu geu hartzen gaituen hizkuntza, harrera eginen duena eta guztion eskubideen alde eginen duena. Orain, hemen. Bihar, leku guztietan. Izan gaitezen bidearen parte. Izan gaitezen zorioneko.