Aste honetan hasi naiz 9-10 urteko haurrekin online matematika tailerra egiten. Gaitasun altuak. Sekula ez zait etiketa gustatu. Tira, agian etiketa ez; agian etiketaren ondorengoak dira sekula gustatu ez zaizkidanak. Gero eta konbentzituago bainago, arlo batzuetan behintzat, beharrezko dela ikasle batzuei material berezia eskaintzea.
Atzo jaso nuen lehen lana eta emozionatu egin nintzen. Nahi zuten moduan eta nahi zutenaren laguntzaz egiteko esan nien. Artean ez ditut haien aurpegiak eta ahotsak ezagutzen. Artean izen bat baino ez dira. Baina emozionatu egin nintzen pantailaren aurrean. Emozionatu ninduen azalpenen zehaztasun eta sinpletasunak; hitz bat ere ez sobera. Emozionatu ninduen ideien argitasunak.
Ikasturteko lehen entzunaldia etorri zitzaidan gogora. Lehen duoa amaitzean irakasleak jarri zuen sorpresa aurpegia txaloka hasi aurretik. Ikasle moduan oso maiz nabaritu arren, agian irakasleok gehiagotan gogoratu beharko genuke zein garrantzitsua den ikasleek harritu gaitzaten prest egotea.
