Isiltasun-minutu bat, Irratian hain kezkagarriak diren hutsune horietariko bat, tarte labur batez badarik ere. [...]
Lasai, entzule; konexioa ez da eten, ez dago neholako arazorik Euskalerria Irratiaren seinalearekin. Begirunezko isiltasun-minutu bat baizik ez, isiltasun ozena entzun dadin, zilegi bazait erabiltzea jadanik maiztuta dagoen oximoron hori, isiltasun ozena. [...]
Isiltasun ozena beraz, jadanik erranda dagoena berriz ere ez esatearren, hori baino ez. Errespetuzko isiltasun-minutu bat, minutu bateko isilunea eginen nuke nik Gaza-n Israelek sarraskitutako palestinarren alde... Haatik, armada sionistaren tiro-hotsek jarraitzen dute isiltasuna eta su-etena urratzen. Israelgo armadak Gazan inpunitate osoz bonbak jaurtikitzen jarraitzen dueino, minutu bateko isilunea ez da atxikitzen ahal: ezinezko ariketa bat da.
Mikel Laboak kantatu zigun: Zer dio isiltzen denak / isiltzen denean. Erranairu zahar batek zera dio: “Entzun eta isil, baiezko borobil”. Israelgo armada kriminalaren inpunitatearen aurrean ez dago isilik geratzerik; ezin isilik egon: ezta minutu bat ere.