Saharara Hiru Miru heldu da

Erabiltzailearen aurpegia

Espainian inoiz egon omen den gobernurik aurrerakoienak armak eta ibilgailu blindatuak bidali eta bidaliko ditu Ukrainara, bertako herritarrek euren burua defenda dezaten konkistatzaile atzerritarren aurka. Era berean, Espainian inoiz egon omen den gobernurik aurrerakoienak Mendebaldeko Saharara armak eta ibilgailu blindatuak bidali eta bidaliko ditu bertako herritarrek euren burua defenda dezaten konkistatzaile atzerritarren aurka... Oh, wait! Ez, bada! Marokoko indar armatuek bertako sahararrak zanpatu eta zapaldu ditzaten.
Bestelako materiala bidali berri da Euskal Herritik Saharara, zeren eta hitza da gure arma bakarra, sahararrak kulturaz blindatzeko. Erdi baztandar erdi txantrearra den Kris Domeño lagunari esker, Hiru Miru izeneko album ilustratua heldu da Saharako errefuxiatuen kanpamentuetako liburutegietara. Euskaraz idatzitako ipuin hori, Maite Ramos Fernandezek ilustratua, arabierara eta gaztelaniara itzulia izan da, hurrenez hurren, Sidahmed-Ergueibi Mohamed-Maaruf-en eta Koro Azkona Huercanosen eskutik.
Hiru Miru, elkartasunaren metafora, hemen ere salgai dago, Aaiun-en eraiki nahi den liburutegirako dirua biltzeko asmoz. Bost kanpamentuetatik lautan daude liburutegiak martxan... Beraz, liburutegi bat falta da, Aaiunen, eta hori eraikitzea dugu xede eta amets, Hiru Miru horiek Aaiungo errefuxiatuen kanpamentuan ere habia bat izan dezaten.