Santu Guztien egunaren karietara, gaurtik eta igandera arte ibilgailuentzat itxita egonen dira Iruñeko Hilerriko sarrera guztiak. Halaber, villavesek ohi baino geldialdi gehiago eginen dituzte kanposantuaren inguruan.
18. Bertako Antzerki zikloaren barruan, Asimetria antzerki taldeak Empachados antzezlana taularatuko du gaur, ilunabarreko zortzietan, Civivox Iturrama aretoan. Gazteleraz izanen da eta doan, baina aldez aurretik gonbidapena jasota.
Larunbatean, bi hitzordu: batetik, familia osoarentzako rock ikuskizuna Billy Boom Band taldearen eskutik hiru euroan. Bestetik, gaueko bederatzietatik aurrera, Izuaren Gaua Gazteriaren Etxean.
Bestalde, bihar, larunbatarekin, hainbat trafiko mozketa eginen dituzte; izan ere, Harresietako Lasterketa eginen dute Alde Zaharrean, Zabalguneetan eta Arrotxapean zehar. 6, 10 eta 20 kilometroko ibilbideak izanen dira. Udaltzaingoak trafikoa birbideratuko du mozketa gune garrantzitsuetan.
Bihar, ilunabarreko zortzietatik aurrera, Halloween gaua ospatzeko hainbat ekitaldi izanen dira Yamagutxi plazan. Besteak beste, haurrentzako ezustekoak eta ‘Son, risas y lagrimas’ taldearen kontzertua.
Bihar, halaber, Gazteriaren Etxean Izuaren Gaua ospatuko dute. Bederatzietatik aurrera, gazteentzako hainbat aktibitate izanen dira, musu truk: mozorro lehiaketa, ipuin kontalariak, karta eta rol jolasak, ginkana…
