Tafallan egon ginen azkenekoz elkarrekin, eguzkitan. Joxemari Esparzarekin genuen hitzordua. Ardo zuritan joan zitzaigun eguerdia. Umezurtz egin zintuzteneko haurtzaroaz hitz egin zenigun. Abuela Erromualdaren ateraldiez. Apaiztu zinenekoaz. Desapaiztu zinenekoaz. Burgosko prozesuaz. Euskaltzaletasunaz. Herri ekimenaz. AEK-z. Korrikaren hastapenetaz. Memoriaz. Eragindako desmemoriaz.
Zertaz ez genuen hitz egin eguerdi-arratsalde hartan!
“Caramba, Franco, qué cara de estúpido que tiene usted, parece un animal. Cabeza de burro, gran cerdo cornudo, dentro de cuatro días vas a reventar”. Apaiztegi estiloan kantatu zenizkidan, barre txiki pikaroarekin. Algara atera zitzaizun apaiz ajea agerikoa zenuela esan nizunean. “Ez zen lau egunetan lehertu, ez...”, onartu zenuen halako batean.
Barre hots hori eta zure ile urdin tentea gogoan, hil zarela jakin dudanetik.
Ez zaitut ahanzteko, ez.
Agur, Julen Kaltzada jauna.