Umela zegoen giroa atzo goizean Elizondon. Jagoba Manterolaren argazkian, bi gizonezko datoz kamerarantz: bata txanoa buruan eta plastikozko pantaila aurpegi aurrean. Bestea maskararekin. Han barrenean hiru aterkidun ageri dira. Kaleko eszena arrunta, egunerokoa, Elizondon. Gauzak argitu eta gero. Izan ere, lau aldiz behintzat aldatu omen dute konfinamenduko protokoloen aplikazioa Baztanen.
Arazoa da hamabost herri direla udalerri bakarrean, 7.777 biztanle guztira, baina herri bakoitza bost mila biztanletik beherakoa. Zein irizpide aplikatu behar da? Administrazio publikorako hurrengo oposaketetan planteatu dezakete kasuaren ebazpena, funtzionario txorrotxak fitxatzeko. Baztandarrek argi zeukaten zein erregimen zegokien, baina Espainiako Gobernuaren ordezkaritzak ez zien ulertzen; edo ulertu nahi ez. Badakizue, paradigma hausten duenak molestatu egiten du.
Dantxarineako muga zabalik dagoela kontatzen du Mari Ane Txoperenak erreportajean. Zabalik, alde batetik bestera lanera joan behar dutenentzat. Zabalik, Espainiako eta Frantziako polizien zaintzapean. Bentak, berriz, itxita. Bostehun langiletik gora lan erregulazioan. Zer kontrabando klase egin ote daiteke gaur egun?