Pankarta daramaten emakumeak betaurreko beltzez ageri dira; baina irribarretsu. Alegia, betaurreko beltzak eguzkiari aurre egiteko daramatzatela, eta ez begiondoko ubeldurak estaltzeko.
Emakumeen autodefentsa, autodefentsa feminista gisa ulertuta; hori da BERRIAk gaur dakarren zortzi orriko eranskinean datorren gaietako bat. Feministok prest kanpainaren berri alboan. Emakumezko errefuxiatuei buruz dihardu Maryam Fathi kurduak. Beste feminismoak izeneko ekimena ere aurkezten zaigu, hau da, feminismo afrikarra, deskoloniala eta gorria lantzen dituen irakurle taldea.
Eranskinean toki gehien hartzen duen gaia beste bat da: Araba, Bizkaia eta Gipuzkoako barrutian 51 hedabide eta publizitate agentziek sinatu duten Publizitate eta komunikazio ez-sexistarako kode deontologikoa.
Denak behar oraindik. Eta kolore moreko diskurtsoak inoiz baino ugariago eta indartsuago dabiltzan garai honetan, pozarekin batera, baita sakonean erroturiko tristura belun bat ere: atzeko belaunaldietatik datorkigun estigmatizazio ezabagaitzaren erremina.
