Asaldagarria

Gaurko argazkia ez da esistitzen; izan ere, gaurko argazkiak izan behar zuen Carme Forcadell eta Felipe VI.ren artekoa, hura honi Carles Puigdemonten inbestiduraren berri ematen; baina ez, Espainiako Erregeak uko egin dio Parlamenteko presidentea hartzeari.
Ulertzekoa da Espainiako Erregea atzo ez egotea inor hartzeko tenplean; arreba eta koinatua epaileen aurrean egonda, Palmara begira izango zituen begiak eta belarriak. Bestetik, Forcadellen azalean jarrita, a zer lasaitua; ze Felipe VI.ak hotz eta haserre aurpegiarekin azaldu beharra zeukan Parlamenteko presidentearen aurrean, petralduta erabat, Katalunia ematen ari zaizkion nahigabeen faktura pasaz; hala agintzen du borboitarren protokoloak.
Beste kontu bat litzateke Felipe VI.ak Urkullu lehendakaria hartu beharko balu. Ze Urkulluk badauka zeregina Erregearentzako; honek lideratu behar omen luke Espainiako Estatuaren eraikuntzarako interpretazio zentzuzko baten bilaketa.
Igandean Diario Vascori emandako elkarrizketan esan zuen hori Urkulluk azkenekoz. Bide batez, gustuko lerroburuak eskaini zizkion egunkari giputzari: “Asaldatu egiten nau ardurarik gabeko mugimendu sozialek baldintzatzea Katalunia” edo, beste modu batera esanda: “Asaldatu egiten nau Katalunian mugimendu sozialek alderdien sistema aldatzea”.
Hor zapaltzen dizkio juaneteak Kataluniako prozesuak, borboitarra erreskatatu nahi duen lehendakariari.