Dotorea etxea, balkoi zabal handiak, baranda burdinazkoa borobilak eginez zutabetik zutabera… Dotorea izan behar zuen estilo modernistako etxea txikituta ageri da, ez leihorik, ez aterik, hortzak galdutako ahoa bezala, dena zulo. Beheko balkoian gizon bat, dotorea hau ere, ikusmiran: etxeak jasan duen txikizioa neurtzen. Argazki oinak argitzen du Kumanovoko herritarrak atzo itzuli zirela beren etxebizitzen egoera aztertzera.
Kumanovo Mazedoniako hirugarren hiria omen da; zapatuan hasi ziren liskarrak talde armatu baten eta segurtasun indarren artean; emaitza: 22 hildako. Gobernuak auzoko kosovarrei leporatu die ekintza; kontua da gaizki itzalitako sua nola, edozein txinpartarekin pizten dela borroka Balkanetan oraindik ere.
Beste argazki honetako txikizioa ez da hain bistakoa, hain izugarria, lehen begiradan. Hiruzpalau lagun, hesitutako barruti industrialean, ikusmiran hauek ere, robot erraldoi bat izan zitekeenaren besoa lurrera etorrita… Istripuaren emaitza, badakizue, bi hildako atzo Funesen. Hilabete eta erdian bost langile hil direla Nafarroan, hamahiru Euskal Herri osoan…
Txikizio honetarako ez da txinpartarik behar; egituran eta antolaketan sartzen da kostu hau, proiektuetan ez azaldu arren, baina hor dago, tinta ikusezinean idatzita. Gero odolaren gorria bihurtzen da, estatistiketan.
Elixabete Garmendia
EUSKALERRIA IRRATIAzale hori:
FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.
Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.
Izan ere, zenbat eta komunitate handiagoa, orduan eta proiektu komunikatibo eraginkorragoa.
Bazkidetu zaitez!
