Zintzotasuna

Erabiltzailearen aurpegia

Lehengo egunean Manuela Carmenari Donostian gertatutakoak ez nau harritzen. Kortxoenearen hustutze eta eraisketari buruz bere iritzia eman ondoren, norbaitek "si pudiera te escupiría" esan zion haserre batean.

Esan bezala, ez nau harritzen. Askotan ikusi ditugu horrelakoak. "Por qué no te callas" famatu hura, egunkarien web-guneetan egiten diren komentarioak eta abar gogora etorri zaizkit.

Politika azken aldian espektakulu bilakatzen ari dela nabaria da baina horretaz gain badago beste zer esanik kasu honi buruz.

Badirudi, politikarien karikaturizazioan gehiegi jauzi garela. Ez dugu ahaztu behar politikan denok eragiten dugula modu batean edo bestean eta botere handia dutenei erantzukizuna eta zintzotasuna eskatu behar diegula, beti ere guretzako eskatzen dugun errespetu berarekin.

Tamalez, ahoa irekitzeko edo teklatua sakatzeko garaian, besteei eskatzen diegun zintzotasuna, guretzako ez dugu beharrezkoa ikusten, eta horren adibidea da lehengo egunean gertatutakoa.