Steiner-en opari arantzaduna

Erabiltzailearen aurpegia

George Steiner pentsalaria astelehenean hil zen, haren jarraitzaileoi opari ederra utzita: elkarrizketa bat, Nuccio Ordineri emana, baldintza batekin: bera hil arte ezin zuela argitaratu. Atzo irakurri genuen, El Paisen. Elkarrizketa mamitsua, bizitzaren errepaso zintzo eta kritikoa.

Elkarrizketak, ordea, gazitik ere badu. Halako batean, hauxe iragartzen dio Ordineri: azken 36 urteotan gutun trukaketa egin duela emakume batekin, eta idazki sorta horrek biltzen dituela bere sentimendu eta iritzi nagusiak. Honaino, dena ongi. Kontua da gustura irakurriko genukeen lana Cambridge-eko Churchill College ikastetxeko artxibo batean dagoela, giltzapean. Eta ez duela argirik ikusiko 2050era arte.

Steinerren jarraitzaileontzat, atzoko opariak arantza hori zuen barnean.