Ni PSOEren zuzendaritza-taldeko kide banintz, dimisioa emanen nuke.
Hauteskundeen biharamunean Pedro Sanchezek eta Iglesiasek ti-ta egin zuten koalizio gobernurako tratua. Dena sekretupean, zuzendaritzako taldekideei ere deus esan gabe. Hala aitortu dute sozialisten zuzendaritza taldeko kideek.
Galdera da: zertarako izan zuzendaritzako kidea, erabaki nagusiak bakar batek hartzen baditu.
Espainiar politikan pertsonalismoa da nagusi. Alderdi politikoak Pedro eta Pablorenak dira, Abaskalena, Errejonena eta Riverarena, azken hori igandeko porrotera arte.
Nik ez dut batere gustuko politika egiteko modu hori. Batetik, alderdiak pertsona bakar baten esku uztean, hura jainkotu egiten dugulako. Eta gainera, haren nahi, gorroto ezinikusi, eta apetek agintzen dute alderdian, estatu baten martxa ere baldintzatzeraino.
Asteleheneko tratuak zerbait erakutsi badu, horixe da: alderdiak, gero eta gehiago, jainko baten esku daudela. Eta gauza jakina da jainkoturiko jendeak kalte handia egin dezakeela.
