San Fermin Ikastolan bisitan izan nintzen atzo, Haur Hezkuntzaren eraikinaren inaugurazio ekitaldian.
Eraikin zoragarria da: zabala, argia, atsegina, malgua. Arkitektura konfiantzaren pedagogiaren esanetara makurtu da. Helburua da haurrak goxo, gustura egotea, heziketa oparoena konfiantza giroak ematen duelakoan.
Ikastolen alde onen artean dago, hasieratik, pedagogian oso berritzaileak izan direla. Euskal Herriko beste lurraldeetan bezala, hemen ere beste inork eskaintzen ez zuen euskarazko irakaskuntza bermatu zuten. Ez dira publikoak, ez dira pribatuak. Herritik sortu ziren, gurasoen kooperatiben izaera juridikoa harturik.
Nafarroan estrategikoak izan dira euskararen biziraupenerako. Eta estrategikoak dira gaur ere, kalitate handiko irakaskuntza eskaintzen dutelako, euskara ardatz nagusitzat harturik.
Atzo San Fermin Ikastolako eraikin berrian paseatzen ari nintzela batek hiru-lau urteko ikasle izan nahi lukeela pentsatu nuen, eremu zabal, argitsu eta atsegin horietan bizitzen hasteko.
