Garai bateko neguak oraingoak baino gogorragoak, elurtsuagoak, eta euritsuagoak omen ziren. Hamaika aldiz entzundako esaldia errepikatzen zutenak mutu daude aurten. Ez da harritzekoa.
Xalbadorrek apiril hasieraz eta udaberriaren etorreraz bertso ederrak ditu eginak. Apirileko goiz batean esnatu eta etxe aitzineko sagar arbolan txori bat kantari sentitu zuen. Urepeleko artzaina orduantxe konturatu zen negu zitalak lekua utzi ziola primaderari.
Zitaletan zitalena aurtengo negua. Egutegiak aspaldian udaberriaren etorrera iragarri bazuen ere, neguak temoso segitzen du primaderari lekua kenduz, gugandik alde egiteko batere asmorik gabe. Eta guk, momentuz, goizean txoria kantari sentitzeko esperantzarik ez. Egun batean esnatu eta guardasola etxean uztearekin konformatuko ginateke.