Nafarroako Gobernuak ez ohiko lan eskaintza publikoa iragarri berri du: bi mila lanpostu baino gehiago. Azken urteetan, Foru Administrazioko langile askok erretiroa hartu badute ere, lan eskaintza oso murritza izan da, Madrildik ezarritako debekuaren ondorioz. Beraz, langileria finkoak behera egin du, eta kontratatuen kopuruak gora. Osasunbidean kontratatuen kopurua ehuneko berrogeita hamaikaraino heldu da. Erdiak baino gehiago, beraz, kontratatuak.
Gobernuaren asmoa ezagutu eta txalotzeko moduko erabakia zelakoan nengoen. Behingoz lan eskaintza publiko zabala. Ba, nonbait, ez da horrela. Comisiones Obreras sindikatuko ordezkari bati entzun nion atzo irratian. Haren ustetan, ez dago pozteko arrazoirik. Izan ere, ez ohiko lan eskaintza ez da aski, horrekin ez baita behin behinekotasun arazoa guztiz konponduko.
Hori da marka! Urteetako lehortearen ondorioz euria egiten hasi eta horrekin ere haserre, lehortea betiko konpondu ez dugulako.
Duela bi urtetik, batzuk asetzea oso-oso zaila da.