Hemen banderak aise astintzen ditugu, nork berea. Kontsignak ere oso gustuko ditugu. Arrakasta handikoak dira, jendeak aise erosten ditu. Badakizue: dena zuri edo beltz, ñabardurarik gabe.
Hori da, neurri handi batean, gaur egungo politika, eta komunikabide gehienek ere horixe elikatzen dute.
Zorionez, gure artean bada gogoeta bultzatzen duenik. Solasbide elkartea, horietako bat. Urtero gai interesgarria aukeratu eta sinesmen eta ideologia anitzeko biltzen du horretaz hitz egiteko.
Aurtengo jardunaldia etzi izanen da, “Gazteak eta Europa: errealitatea eta itxaropena”, gaiaz mintzatzeko.
Nik badakit holako ekimenen oihartzuna oso apala izaten dela. Banderak astintzea edo kontsigna merkeak botatzea eraginkorragoa da, batek komunikabideen arreta nahi duenean. Kontua da, nire ustez, kontsigna gutxiago eta hori bezalako gogoeta gehiago behar ditugula.