Udan sartuko gaituen hilabetea hasia da. Ekaina, niretzat, gustuko hilabetea izan da beti, haurtxoa nintzenetik. Orduan, kurtso amaierako helmuga hurbil ikusteak poz handia ematen zuen. Bagenekien Sanjuanetara heltzeak opari ederra zekarrela: aio liburuei, ongi etorri haurtzaroko uda luze-luzeari!
Zer esanik ez dago: guk urtetan aurrera egin ahala, hilabeteak, kurtsoak eta bizitza bera azkarrago doaz, askoz azkarrago. Eguberrietatik Sanferminetara salto batean, ia konturatu gabe; eta uztailetik urte amaierarainokoa ere di-da batean pasatzen da.
Komunikabideek diotenez, Garesko Aldaz enpresako arotzak gaurtik lanean ari dira entzierroko hesiak paratzeko. Tonbola ere Sarasate pasealekuan martxan dago. Hortaz, festetara eramanen gaituen aldapan behera ari gara. Hilabete barruko kontuak gogoan, beraz.
Noizbait iragana eta etorkizuna alde batera utzi eta unean unekoaz gozatzen ikasi beharko genuke.
Estreinatu berri dugun ekaineko egun argitsu honetaz, esate baterako.