Nik ere gozatu egin nuen atzoko partidarekin. Hiru lagunekin elkartu, eta zortzietarako hortxe ginen hirurok partida noiz hasiko zain. Asteazkenero egiten dugun pilota partidaz ari naiz. Partida amaiturik, polikiroldegiko ostatura joan ginen. Ohi baino askoz jende gehiago zegoen, guztiak telebistari begira. Ostatuko arduraduna pozik, asteko diru-bilketa handiena egin zuelako.
Oso futbolzalea ez izan arren, nik ere Osasuna lehen dibisioan ikusi nahi nuke. Ostatuko arduradunak, astean behin bada ere, diru pixka bat bilduko duelako eta milaka zalek poz handia hartuko dutelako. Eta bada beste arrazoi bat, noski. Jakina denez, Osasunak zor handia du guztiokin. Lehen dibisiora igotzen bada, diruz hain urri dabilen Nafarroako Ogasunak milioi batzuk hartuko lituzke.
Pentsatzen hasita, baliteke nafar funtzionarioei zor zaien aparteko ordain-saria ordaindu ala ez Merino edo Flañoren esku egotea. Edo, hobeki esanda, haien oinetan.
