Erlijioaz bi hitz

Erabiltzailearen aurpegia

Elkartasuna, jendetasuna, hurkoaren tokian jartzea… horiek guztiak ikasi nituen txikitan. Ikasi, diot, praktikatzea bertze kontu bat da. Eta ikasi, testuinguru erlijioso batean ikasi nituen. Baina testuinguru hori gabe ere ikasiko nituen, bistan dena. Ez dugu erlijioaren beharrik hobeak izateko. Bertze batzuek, berriz, erlijioaren baitan hazi dute beren gorrotoa, beren hertsikeria, beren hurkoa menderatu nahia eta desberdinarekiko herra. Parisen ikusi genuen joan den ortziralean. Baina, ez dezagun begitik gal: bertze toki batzuetan bertze pertsona batzuek hazi dute antzeko gorrotoa, antzeko hertsikeria, desberdina menderatzeko edo suntsitzeko antzeko grina, batere erlijioaren beharrik gabe. Ez dugu liburu sakratu baten beharrik putakume batzuk izateko.