Batzuetan gure aitonari ahaztu egiten zaio hilda dagoela,
joan zenean geratu ginenoi maileguan utzi zizkigun hezurretara itzuli
eta egon egiten da
egitea egotea balitz bezela.
Aspertzeaz aspertzen denean,
nola hartz bezatu gabeak kaiolan barrena
alderik alde zeharkatzen du nire izena
eta erran egiten dit
erratea erratzea ez balitz bezela,
denbora atzerako ispilu bat dela
izango ez garena ere bagarela
urik ez dakartenetan ibaiak ez direla ibai,
oraingoz, oraindik, orain,
eta ez egoteko astearteak asteazkenetan zer egingo zain,
Batzuetan gure aitonari ahaztu egiten zaio hilda dagoela,
eta bizitzeko esaten dit,
hiltzeko beti dagoela denbora,
eta bizitzeko hil arte bakarrik.