Joseba Asiron EH Bilduko Iruñeko alkategaiari babesa emanda, Geroa Baik "lerro gorri" hori gainditu duela uste du Esparzak, eta gaineratu du "gidoia" betetzen ari dela, Asiron Iruñeko alkate eta Barkos Nafarroako Gobernuko presidente izateko bidean.
Halaber, Esparzak kritikatu du Ahal Dugu eta Ezkerra "konplize" gisa erabili dituztela Geroa Baik eta EH Bilduk Nafarroa "euskal diputazio bat gehiago" izan dadin. Horren harira, Pablo Iglesias Podemoseko idazkari nagusiari kontuak eskatu dizkio "Batasunako gobernu bat" babesteagatik.
Enrique Maia UPNko Iruñeko zerrendaburuak ere gogor jardun du: "ETA gaitzesten ez dutenek gobernatuko dute". Nabarmendu du UPNk EH Bilduren zinegotzi kopurua baino bi bider gehiago dituela, eta Iruñea kudeatzeko "zailtasun handiak" izango direla iragarri du.
