Manifestazioa 18:00etan abiatuko da Antoniutti parketik, baina aurretik bi zutabe abiatuko dira. Bata, Barañain eta Donibanekoa, Golem zinemetatik irtengo da 17:30ean, eta bestea, Iturrama eta Arrosadiakoa,bunkerretik 17:30ean.Datorren astelehenean hasiko den Iruñerriko hamar gazteren kontrako epaiketaren harira antolatu du «manifestazio zaratatsua» Iruñerriko Herri Harresiak.
Mikel Marin, Iker Aristu, Diego Octavio, Iker Araguas, Ibai Azkona, Oihan Ataun, Mikel Beunza, Iñaki Marin, Gorka Sueskun eta Mikel Flamarique dira epaituak izango diren gazteak. 2008ko iraila eta azaroa artean atxilotu, eta espetxera bidali zituzten Segikoak izatea leporatuta. Inkomunikazio aldian torturak jasan zituztela salatu zuten. Zazpi bermepean aske utzi zituzten handik hilabete batzuetara. Araguas, Marin eta Azkona espetxean daude oraindik.
Epaiketaren saioak dauden egunetan bilkurak egingo dituzte, 10:00etatik 12:00etara, Espainiako Gobernuaren Iruñeko Ordezkaritzaren aurrean. Maiatzaren 4an eta 11n, PPren egoitzaren aurrean ere egingo dituzte bilkurak.
