Sanferminetara joatera deitzeko hainbat enpresak egindako iragarkien artean irudi sexistak ageri direla salatu du Iruñeko Peñen Federazioak, eta esku hartzeko eskatu dio udalari. Ohar batean adierazi duenez, iazko txupinazoan gertatutako sexu erasoen irudiak erabili dituzte hainbat bidaia antolatzailek erakargarri gisa.
Federazioak gogoan izan du iazko sanferminetan sexu erasoen kontra abiatutako kanpaina, eta deigarria iruditu zaio kanpaina horren ostean udalak esku hartu ez izana iragarki horien aurrean: "Erasoen irudiak erabiltzeak eta horien aurrean erantzun irmorik ez egoteak ahalbidetzen du urtero-urtero gure jaietan emakume ugarik erasoak jasatea". Gainera, salatu dute Iruñea "legerik gabeko hiria" delako irudia ematen dutela iragarkiok.
Festak "berdintasunean eta sexu erasoetatik libre" ospatu ahal izatearen alde lan egiten jarraituko duela agindu du federazioak.
