Kontzertu batzuen ostean miaketak egin zituen Poliziak, eta atxilo hartu zuten emakume bat. Dirua zenbatzen ari ziren lau lagun, eta Guardia Zibilak, laurek "jarrera susmagarria" zutela argudiatuta, miatu egin zituen. Miaketa hori "modu oldarkorrean" egin zuten poliziek, baina libre utzi zituzten laurak.
Guardia zibilak berriro itzuli ziren, ordea. Lekukoek salatu dute poliziek jarrera "probokatzailea" izan zutela, eta emakume bat ordezkari publikoei deitzekotan zenean, sakelako telefonoa kendu zioten guardia zibilek. Emakumea atxilo hartu zuten, "aginteari erresistentzia egitea, txistua botatzea eta jotzea" egotzita. Hala egin izana ukatu dute, ordea, lekuko ugarik, Naiz-ek argitaratu duenez. Ordu batzuk geroago aske utzi zuten andrea.
Guardia Zibilak eta Espainiako Gobernuak Nafarroan duen ordezkaritzak zabaldutako bertsioaren arabera, LAB sindikatukoa da atxilotua, baina informazio hori gezurtatu du sindikatuak.
