Putzua

Erabiltzailearen aurpegia

Egun asko iraun duen erreskatearen ondoren, hilda agertu da Andaluziako herri batean putzura erori zen haurra. Zoritxarrez, hori gertatzea zen posibleena. Baina, hain zuzen, bazirudien egoeraren detailerik txikiena ere esplikatu diguten telebista espainiarrek ez zutela aukera horri buruz hitz egin nahi, eguna joan eta eguna etorri haurra putzutik ateratzeko lanen kontakizuna egiten zuten bitartean. Inportanteena, dirudienez, gaiari soka ematen jarraitzea zen. Hitz egin dezagun honetaz, audientzia ematen du eta, topikoa topikoaren gainean, geure buruak aspertzeraino eta, posible bada, pixka bat harago.

Espektakulu tamalgarria ikusi dugu, informatzeko helburua baino, herritarren emozioak mobilizatzea xede izan duen operazio mediatikoa. Norantz mobilizatu? Egunotan telebista jarri duenak entzunak izango ditu "Espainia guztitik" iritsi diren elkartasun keinuen ingurukoak, baita Guardia Zibilak egindako lanari txaloak ere. Boltaje handiko panorama politikoaren erdian, gertakari lazgarri honek balio izan die batzuei euren nazionalismoa bultzatzeko ere. Putzu horretan ez erortzen ahalegindu behar genuke.