Espero ez zen errebuelta hartu du kurtso politikoak eta bat batean argazki imajinaezinak agertzen hasi zaizkit pantailan. Arreta deitu didatenen zerrenda egin dut. Bat: Podemosen Madrilgo diputatuak Pedro Sanchezen presidentzia ospatzen, kasik PSOEkoak baino grina handiagoz. Bi: Mariano Rajoy jatetxe batetik ateratzen, pixka bat, nola esan, piripi. Hiru: telenobela venezuelar bateko protagonista dirudien norbait Espainiako presidente. Lau: Euskal Herria ardatz duten partiduen diputatu guztiak hura babesten –EAJrena izan da gehien komentatu dena, baina niri EH Bildurenak jarri dizkit begiak globoak bezala–. Bost: Patxi Lopez esaten berak ez dakiela ezer ministro izateko kinielez; Patxi Lopezen bekain urduria esaten berak badakiela zerbait ministro izateko kinielez. Eta sei: Maria Chiviteren ausentzia larunbateko manifestazio euskarafoboan, auskalo, agian klima politikoaren aldaketak eraginda.
Bihar ikusiko da zer dagoen berri, jakintsuenak ere ezin du igerri. Ulertuko nuke batzuk esperantzatuta egotea Rajoy bota ostean, baina horrelako egoeretan komeni da hautsa kentzea 78ko Erregimenaren contraco manual debotionezcoa-ri. Lehenbiziko orrialdetik azkenekoraino, esaldi hau errepikatzen du liburuak: EZ FIDATU PSOE-REKIN.
