Milaka euskal herritarrek Altsasuko gazteen kontrako operazio polizial, mediatiko eta judiziala Iruñeko kaleetan salatu duten asteburu berean, UPNk bat egin du Espainiako Poliziarekin eta Guardia Zibilekin, eskatzeko bi talde armatu horietako agenteek izan dezatela ertzainek edo Esquadra Mossoek duten soldata bera. Eta asteburu berean kaleak hartu dituzte ehiztariek ere, oraindik ulertu ez ditudan arrazoiengatik. Eskuineko hedabideek, gurean gehien saltzen direnek, arreta handia eskaini diete manifestazio horietako batzuei –ez dut esplikatu behar zeintzuei, ezta?–.
Fenomeno berri samar baten aurrean gaudela esango nuke: kaleko mobilizazioek, orain dela gutxi arte, ezkerreko kutsua zeukaten gure artean, tarteka salbuespenak baziren arren. Orain berriz, gutxien espero duzun asteburuan dauzkazu polizia agenteak pankarta hartuta; baita gure hillbilly-ak ere, hainbeste maite duten hobby-aren alde eskopetak husteko prest. Pixka bat kezkatzen nau armak erabiltzea ofizio edo afizio dutenak mobilizatuta ikusteak: lehenbizikoek, poliziek, lan orduetan ere gehiegitan hartzen dutelako kalea; eta bigarrenek, kalera ateratzeko motibo sakonagoak izan beharko lituzketela uste dudalako. Altsasuko gazteen alde egitea, adibidez.
Manifestazioak eta manifestazioak
2018ko api. 16a, 14:33
EUSKALERRIA IRRATIAzale hori:
FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.
Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.
Izan ere, zenbat eta komunitate handiagoa, orduan eta proiektu komunikatibo eraginkorragoa.
Bazkidetu zaitez!