Ez al dira geroz eta gauza historiko gehiago gertatzen? Gertakizun jendetsu samar batean parte hartu eta hori ez dela ohikoa jabetzean, norbaitek "historiko" hitza paseatzera ateratzeko aukerak behintzat, biderkatu egin dira azkenaldian; eta hitzaren gehiegizko erabilera prentsa idatzira ere iritsi da, bigarren eskuko material hauek erabiltzen abilak baikara kazetariok.
Historia hainbeste aipatze hau zergatik gertatzen den pentsatzen aritu naiz eta "like"-aren kulturak zerikusia izan dezakeela otu zait: dena "atsegin dut" edo "ez dut atsegin" klikatuz baloratzen dugunez, ez da harritzekoa gure ohiko hizkera ere binarismo sinplifikatzaileetara lerratzea: egun "normalak" edukitzen ditugu eta tarteka egun "historikoak".
Hori dela pentsatu nahi dut eta ez aukera, segur aski, deprimenteago bat: inportanteak diren gauzak historiaren kutxan gordez, urrundu egin nahi ditugula gure eguneroko jardunetik, sinetsita bizi garelako hemen eta orain egiten dugunak ezer ez duela balio.
