Atzo, Altsasun bizi diren Guardia Zibilen aldeko elgarretaratzea egin zuten Merindadeen enparantzan. Europa Press agentziak erran zuen 2.500 elkartu zirela. Argazkiek ez dute asko laguntzen, baina, mesfidati dei nazazue, ez nuen sinetsi. Gaur, Diario de Noticias egunkariak dio 1.000 izan zirela. Antena3ek, bertzalde, "multitudinaria manifestación" izan zela hedatu du. Erromatar hauek txoratuta daudela erran dezakegu, baina tuntunak ez dira. Azken finean, berdin zaie zenbat egon ziren, jendeak sinetsiko duenarekin aski dute.
Bildutako pertsonak banan-bana kontatzeko aukera emanen lidakeen argazkiaren bila aritu naiz. Uharteko egunkariak argitara eman duena da erabilgarriena, baina kalitate eskasegia dauka anpliatu eta buruak zenbatzen hasteko.
Ez dakit zenbat lagun bildu ziren atzo Merindadeen Plazan, baina, berriro ere, gauza bat argi dago: jendearen etorkizuna epaile baten bitartez erabakitzeko indarra daukanak ez du karrikan indarra erakusteko beharrik. Agintzen duenak agintzen duela demostratuz agintzen du.
