Atzoko hauteskundeen emaitzaren lehen iruzkina, Euskalerria Irratian, bat eta bakarra izan behar duelakoan nago.
- UPNk lortu du. Euskaldunon aurkako politika sektario eta linguizidak honako emaitza ekarri du: Nafarroa Garaiko Gobernuko lehendakari euskalduna eta Iruñeko alkate euskalduna.
Bigarren iruzkina: UPNren abertzaleen aurkako politika sektarioak emaitza hau ekarri du: lehendakari eta Iruñeko alkate abertzaleak.
Hirugarren iruzkina: UPNren handikien aldeko etengabeko politika ustelak gaurko emaitza ekarri du: lehendakari progresista eta alkate ezkertzalea.
Laugarren iruzkina: alkate euskaldun edo euskaltzaleak Tafallan, Zangozan, Altsasun, Baztanen, Burlatan, Antsoainen, Berriozarren, Uharten...
Eta azken gauza bat, sinbolikoki eta historikoki inportantea: badirudi aukera handiak daudela Lizarrako alkatea, 80 urteren buruan, berriro ere, abertzalea izan dadin, Fortunato Agirreren lekukoa hartuz.
Egun historikoa atzokoa. Kasu honetan, zalantzarik gabe, ez da retorika hutsa.