Nafarroako panorama politikoa ez da batere aspergarria. Aldaketak ugaltzen dira, batzuetan ustekabe gisa, Marmotaren Egunaren aldarte moduan beste batzuetan. Oraingoan Navarra Sumaren bukaera antzestu berri du UPNk. Ciudadanos hiltzat ematen du jende guziak eta beraz, ez da oso aintzat hartzen lehia honetan. PPrekiko tentsioa da gakoa, beraz.
Esparzak oreka bilatu nahi izan du nafar eta espainiar eskalen artean, beren apostua Feijoo dela oroitaraziz, baina PPkoek maila guzietan kokatu dute haustura. Mezuak berotzen ari dira egun batetik bestera, baina ikusi beharko da zertan gelditzen den afera hau, bizi garen garaiotan sei hileetako epea oso luzea delako.
Inkestak eta kalkulu matematikoak omen daude UPNren erabakiaren atzean. Algoritmo politikagintza edo, halakoa da gure aroa! Halarik ere, nabarmena da iraganera itzultzeko taupada, nora eta erregimenaren garai gogorrenetara, haiendako batere gogorrak ez zirenak, jakina. Ez dirudi indar erakustaldia denik iraganera itzuli nahi izatea, ezta?
