Hau bezalako saiotxo batean aipatu nuen Troiako Zaldiari ateak irekitzea ez zela ideia ona. Bestela esanik, hobe genuela PSNk giltzarik ez izatea. Tamalez, horixe bera gertatu da eta PSNk, (zoritxarrez, berriro esanen dut) giltza batzuk eskuratu ditu. Dagoeneko erabili egin ditu, Iruñean, Lizarran, Barañainen, Eguesibarran, Burlatan eta beste hainbat udaletan, zertarako eta eskuinari ateak irekitzeko. Izan ere, hau izaten da Troiako Zaldien zeregin nagusia.
Aitor dezagun, beraz, hiribilduaren erdian dugula aipatu zaldia. Ezin dugu itsuarena egin, hiribildutik at segituko balu bezala. Barruan dago eta orain, ene uste apalean, egin dezakeen kaltea mugatzea da erronka, erdietsi dituen giltzak indargabetzeko aukerak sortuz. Batzuk korrika joan dira zaldiari ongi etorria emateko. Nor bere hautuen arduraduna da. Edonola ere, zorionez, PSNk ez ditu giltza guziak. Zorionez, berriro esanen dut.