Demokrazia gora eta behera, Nafarroa nafarron nahiaren araberakoa izanen zela; hitz ederrak entzun ditugu haiengandik beti, baina jendearen hitza haien asmoekin bat ez doalarik, akabo!
Abiatu dituzten erasoek argi adierazten digute ez dutela herritarron borondatea errespetatzeko inolako asmorik. Demokraziaren inguruko haien narratiba, azkenean, elitekraziaren egitasmoaren mozorroa zen. Haiendako, hauteskundeak eliteen nagusitasuna zuritzeko tresnak besterik ez dira. Herriak erabaki nahi baldin badu, demokrazia hitzetatik erabakietara eramatekotan, alarma gorri guziak pizten dira eta eliteek joku zikin guziak baliatzen dituzte, kontrola berreskuratzeko.
Lehia pil pilean dago Nafarroan, eta herriak irabazi beharko luke, baina hori ez da gauza segurua, ez bederen erasoari aurre egin eta aldaketa indartzeko erronkan asmatzen ez bada. Ikusiko, beraz!
