Iruñerriko Mankomunitateak Ezkaba mendia garbitzeko auzolana edo boluntariotza-jardunaldia egingo du urriaren 26an, igandea, inguru horretan dauden zaborrak biltzeko. Hain zuzen ere, boluntarioak mendiaren inguruneko herri desberdinetatik abiatzen direnean hasiko da jarduera. Antolatzaileek mendira iristeko toki desberdinak seinaleztatuko dituzte, eta haietan, bertako koordinatzaileek zabor-poltsak, eskularruak, matxardak eta txalekoak emango dizkiete boluntarioei.
Zehazki, abiatzeko tokiak eta orduak hauek izango dira:
| Aitzoain |
10:00 |
Pilotalekua |
| Antsoain |
10:30 |
Alde Zaharreko aparkalekua |
| Arre |
9:30 |
Muebles Rey saltokia |
| Artika |
10:00 |
Kultura-etxea |
| Azoz/Azotz |
10:00 |
Autobusaren geralekua |
| Berriogoiti |
10:00 |
Eliza |
| Berriozar |
10:00 |
Natura-gela |
| Uharte |
10:00 |
Urbiko gunea |
| Orrio |
10:30 |
Igerilekua |
| Iruña |
10:00 |
Psikiatrikoko pasabidea |
| Atarrabia |
10:00 |
Villava hotela |
| Untzu |
10:00 |
Eliza |
Jardunaldia Ezkaba mendiaren tontorrean amaituko da, eta parte hartu duten pertsona guztiak hamaiketakoa jatera gonbidatuko dira. Auzolanerako deia egin duten erakundeak hauek dira: Antsoain, Berriobeiti, Berriozar, Ezkabarte, Uharte, Txulapain, Iruña eta Atarrabia udalerriak; Aitzoain, Arre, Artika, Azotz, Berriogoiti, Zildotz, Orrio eta Untzu kontzejuak; eta Iruñerriko Mankomunitatea. Atarrabiako eta Uharteko taldeetan parte hartzen duten pertsonek herri horien inguruko kokaleku batean jango dute hamaiketakoa, eta boluntarioen bidez emango zaie horren berri.
Auzolanean parte hartzeko, Mankomunitatearen webguneko jardueren atalean eman behar da izena: www.mcp.es. Hain zuzen ere, izena emateko epea urriaren 23a arte, osteguna, egongo da zabalik, eguerdiko ordu biak arte.
IMk kudeatutako parke berria
Ezkabako Eskualde Parkeak gutxi gorabehera 1.000 hektareako hedadura du, eta bere garapen-eremuak zortzi udalerri hartzen ditu: Antsoain, Berriobeiti, Berriozar, Txulapain, Ezkabarte, Atarrabia, Iruña eta Uharte. Udal horiez gain, Eskualde Parkea sustatzean kontzeju hauek ere parte hartu dute: Aitzoain, Arre, Artika, Azotz, Berriogoiti, Zildotz, Orikain, Orrio eta Untzu.
2022ko abenduan, aipatutako esparru horretako toki-erakundeek sustatuta eta IMk koordinatuta, Nafarroako Gobernuak Ezkabako Eskualde Parkearen Udalez gaindiko Plan Sektoriala (UPS) onartu zuen, 2016an hasi ziren izapide konplexu eta korapilatsu batzuen ondoren. 2023ko maiatzean, udalerriek eskualde-erakundeari parke berriaren kudeaketa transferitzea onetsi zuen Mankomunitatearen Batzar Nagusiak.
Une honetan, udalerriekin eta kontzejuekin lan egiten ari da erakundea, Ezkabaren Plan Estrategikoa garatzeko lehentasunak ezartzeko. Plan estrategiko horretan, zehazki, eskualde-parkearen garrantzia nabarmentzeko jarduketa desberdinak jasotzen dira. Babestea eta suteei aurrea hartzea lortu nahi da, bertako natura- eta kultura-ondarea kontserbatzea eta bai erabilerak eta jarduerak arautzea ere.
Iruñerriko Ibai Parkea kudeatzen IMk hainbat urtean hartutako eskarmentuak ahalbidetuko dio erakundeari kudeaketa-eredu horri jarraitzea eskualde-eremu berri honetan.
Mendia mantentzeko eta garbitzeko urgentziazko neurriak
Gogoan izan behar da, urte hauetan, Udalez gaindiko Plan Sektoriala izapidetzea bultzatzen zen bitartean, beti jarri izan dela arreta berezia hainbat proiekturi ekitean. Ezkaba mendian zenbait hobekuntza egitea ahalbidetu duten proiektuak izan dira, zehazki: mendiko bideen eta mendiko bizikletaz ibiltzeko bideen sarea antolatzea, seinaleak jartzea, zenbait pistatara sartzea mugatzea, guneetan mantentze-lanak egitea eta hainbat ekintza gauzatzea boluntarioekin. Testuinguru honetan antolatu da mendia garbitzeko boluntariotza-jardunaldia, eta 2016an, 2021ean, 2023an eta 2024an egin zirenak ditu aurrekari moduan.