Indarrez itzuli da euskararen astea Berriozarrera. Duela hiru urte berpiztu zuten ospakizun hau Ezkabapean kokatzen den herri honetan, hamar urtez itzalita egon ondotik. Herriko jaiak bururaturik, urriko lehen asteburuan ezarria dute hitzordua. Irailaren 22tik urriaren 4era egitaraua ondu dute, eta urriaren 4ean Euskararen eguna ospatuko dute. Ekimenak herriko euskaldunen komunitatea trinkotu ez ezik, euskal hizkuntza berriozartar guztiei gerturatu nahi die.
Zentzu horretan, kirola alorrean eragitearen beharra identifikatu dute. Kirola gaztetxo aunitzen topaleku izanik, Aurrera Beti! ekimena abiatu du udalak. Berriozarko kirol taldeen egoera linguistikoaren diagnostikoa garatu dute, geroan euskararen baliapena eremu horietan errotzeko estrategiak marrazteko. Herriko kiroldegian ere erabiltzaileen soslaia linguistikoa ikertu dute, zentroak proposatzen duen eskaintza euskaraz egin daitekeen aztertzeko. Hain zuzen, euskara hutsezko entrenamendu funtzionalaren jarduera abiatu dute kiroldegian. Azaldu dutenez, sasoian jartzeko jarduera da, maila guztietarako baliagarria, eta astearte eta ostegunetan izanen da, 18:00etatik 19:00etara.
