2024ko maiatzean lortutako parte-hartze prozesuari buruzko akordioaren barruan aurreikusitako aukeretako bat zen galdeketa, eta horri helduko diote. Iruñea, Burlata, Egues eta Uharteko udalek inkesta soziologiko bat eskatu dute Erripagañan.
Auzoko hainbat alderdiri buruz bizilagunek duten iritzia modu "zorrotzean" ezagutzeko aukera emango du galdeketak, diagnostiko erreal eta kontrastatu bat egiteko aukera izango dutela nabarmendu dute lau administrazioek eta hala, aurrera urratsak egiteko aukera izango dute.
Inkesta kanpoko laguntza tekniko espezializatu batekin egingo dute eta hori garatzeko, udalek jarraipen-batzorde bat eratuko dute, inkestaren edukia eta kontratu teknikoaren jarraipena adosteko.
Erripagaña auzoko 10.000 bizilagun ingururen etorkizuna bideratzeko urratsa izango da galdeketa eta udalek nabarmendu dute azken hilabeteetan lan egiteko modu diskretuak giro eraikitzailea sortzen lagundu duela.