Langileek Eskirozko BSH lantegia ixteari alternatibak eskaintzea galdegin diote gaurko elkarretaratzean Foru Gobernuari eta enpresari. Elkarretaratzea egin dute asteazken honetan Nafarroako Parlamentuaren aurrean eta "gizatasun eta enpatia falta" salatu dute.
Herritarren babesa eta "gure erakunde publikoen inplikazioa" eskatu dute lantegiaren bizirautea defendatzeko. Itxiera iragarpenaren berri izan ondoren, BSHko Eskirozeko enpresa batzordeak manifestazioa deitu du larunbat honetarako, abenduaren 21erako, 12:00etan, Golem zinemetatik Parlamenturaino.
Bitartean, gaur Carmen Maeztu kontseilariarekin eta Industriako kontseilari Mikel Irujorekin bilduko dira enpresa batzordeko kideak.
