Kolpe latza Eskirozko BSHko langileendako goizean goizetik. Alemaniako zuzendaritzak iragarri du 2025eko ekainean, lantokia ixteko asmoa duela. 10:30etatik bilduta dira langileen ordezkariak eta Eskirotzeko lantokiko arduradunak, egoeraren berri emateko eta itxiera prozesua nola izanen den argitzeko.
Itxieraren mehatxua buru gainean zuen lantokiak pasa den urtetik honat, baina sorpresaz harrapatu ditu langileak gaur goizeko erabakiak. 2015etik honat erdira jaitsi da ekoizpena, BSH-k Turkian eta Polonian dituen lantegietara bideratu baitu bere produkzioaren zatirik handiena. Eskirozko lantokiari, estatu mailarako ekoizpena geratu zitzaion baina azken hilabeteotan, estatu mailan ere beste lantokietako produktua saltzen ari zen BSH.
Alemaniako zuzendaritzak ohar bidez iragarri du itxiera asmoa, “Eskirozko lantokiak lehiakortasunik ez duela” argudiatuta.
